Sìthichean agus Dùn Bhuirgh na theine.
Fiosraichean
Luchd-clàraidh
Ceann-latha
25 September 1976
Àireamh a’ chlàir
12619
Pàirt 1
fiosrachadh a' chlàraidh
Àireamh a' Chlàir Thùsail
SA1976.177.A6
Àireamh an Teip Thùsail
Geàrr-chunntas
Sìthichean agus Dùn Bhuirgh na theine.
Bha boireannach ann am Borgh aig an robh an t-uabhas obrach ri dhèanamh, eadar càrdadh, snìomh, 's eile. Bha i a' lùigeachdainn gum biodh cuideachadh aice, agus ann am priobadh na sùla bha an taigh làn shìthichean. Theann iad ris an obair, ag ràdh, "Tè a' cìreadh, 's tè a' càrdadh, 's tè a' tlàmadh, 's tè a' snìomh." Cha b' fhada gus an robh iad deiseil, ach chan fhalbhadh iad às dèidh làimh. Thàinig an duine aice a-steach agus nuair a dh'èigh e gun robh Dùn Bhuirgh na theine, theich iad.
Àite a' Chuspair
Siorrachd - Siorrachd Inbhir Nis
Paraiste - Barraigh
Eilean - Barraigh
Baile/Àite - Borgh
Cànan
Gàidhlig
Seòrsa
Cruinneachadh
Tar-sgrìobhadh
Nan NicFhionghain: Agus chuala mi tè eile aca mu dheidhinn tè a bh' ann am Borgh. Boireannach a bh' ann am Borgh. Agus ò, bha an t-uabhas de shnàth aice ri dhèanamh 's i a' dol a dhèanamh clò ann am beart-fhighe. Co-dhiù, thuirt i 's gun a-staigh ach i fhèin 's am bodach aice a-muigh ag obair air a' chroit:
"A Rìgh na Grèine," ars i fhèin, "nach robh cuideigin agam," ars i fhèin, "a bheireadh cuideachadh dhomh leis a' chlòimh a tha seo. Cha bhi mise ullamh dheth gu bràth."
Mun tuirt i Dia leatha, nochd na bha sin a-staigh 's lìon iad an taigh - sìthichean. Thòisich iad air cìreadh... 's thòisich... chanadh iad an-dràsta 's a-rithist:
"Tè a' cìreadh 's tè a' càrdadh 's tè a' tlàmadh 's tè a' snìomh. Tè a' cìreadh 's tè a' càrdadh 's tè a' tlàmadh 's tè a' snìomh."
'S bha an taigh làn, 's cha robh fada gus an robh a h-uile pioc dhen chlòimh aice air a cur air dòigh deiseil airson a cur sa bheart-fhighe. 'S bha iad deiseil 's na dhèidh sin cha robh iomradh aca air falbh. 'S bha an taigh làn.
Thàinig an duine dhachaigh, 's chan fhaigheadh e àite an cuireadh e a chas aig sìtheanaich. Cha robh fios aige bhon t-saoghal gu dè... ged a dh'iarradh e orra falbh chan fhalbhadh. Chaidh e a-mach gu ceann an taighe 's dh'èigh e... 's ann an Dùn Bhuirgh a bha iadsan a' fuireach, na sìtheanaich. Dh'èigh e àird a chlaiginn:
"Dùn Bhuirgh na thèine. Dùn Bhuirgh na thèine."
"Mo chreach, mo chreach," ars a h-uile tè riamh 's iad a' falbh.
Mun canadh e Dia leis cha robh sgeul air gin aca. Bha iad suas Dùn Bhuirgh. 'S dhùin e an doras 's cha d' fhuair iad a-staigh tuilleadh.
"A Rìgh na Grèine," ars i fhèin, "nach robh cuideigin agam," ars i fhèin, "a bheireadh cuideachadh dhomh leis a' chlòimh a tha seo. Cha bhi mise ullamh dheth gu bràth."
Mun tuirt i Dia leatha, nochd na bha sin a-staigh 's lìon iad an taigh - sìthichean. Thòisich iad air cìreadh... 's thòisich... chanadh iad an-dràsta 's a-rithist:
"Tè a' cìreadh 's tè a' càrdadh 's tè a' tlàmadh 's tè a' snìomh. Tè a' cìreadh 's tè a' càrdadh 's tè a' tlàmadh 's tè a' snìomh."
'S bha an taigh làn, 's cha robh fada gus an robh a h-uile pioc dhen chlòimh aice air a cur air dòigh deiseil airson a cur sa bheart-fhighe. 'S bha iad deiseil 's na dhèidh sin cha robh iomradh aca air falbh. 'S bha an taigh làn.
Thàinig an duine dhachaigh, 's chan fhaigheadh e àite an cuireadh e a chas aig sìtheanaich. Cha robh fios aige bhon t-saoghal gu dè... ged a dh'iarradh e orra falbh chan fhalbhadh. Chaidh e a-mach gu ceann an taighe 's dh'èigh e... 's ann an Dùn Bhuirgh a bha iadsan a' fuireach, na sìtheanaich. Dh'èigh e àird a chlaiginn:
"Dùn Bhuirgh na thèine. Dùn Bhuirgh na thèine."
"Mo chreach, mo chreach," ars a h-uile tè riamh 's iad a' falbh.
Mun canadh e Dia leis cha robh sgeul air gin aca. Bha iad suas Dùn Bhuirgh. 'S dhùin e an doras 's cha d' fhuair iad a-staigh tuilleadh.
Cruth Inneal a' Chlàir
Reel to reel
Càileachd an Fhuaime
Math