B2 - 7b - Employment | Fastadh

Transcription

Coinneach Dòmhnallach (CD): Thòisich, na mo bhalach, dar a dh'fhàg mi an sgoil. Bha am post a bha a' dol dhan Àirigh Dhriseach, ochd mìle coiseachd gacha rathad, bha e a' dol a dh'ionnsachdainn saorsainneachd, 's chaidh mise na àite airson ùine ghoirid, agus lean mi ann airson ceithir bliadhna deug, gus gun deachaidh mo thogail dhan arm. Bha mi eadar trì 's a ceithir a bhliadhna anns an arm, 's thàinig mi dhachaigh, 's bha àite falaimh air ceann eile an dùthaich shuas airson post, 's chaidh mi na mo phost ann an sin. 'S bha mi ann gus gun do sguir am post a bha a' dol ann dheth, gu 'n do leig e dheth a dhreuchd le... bha an aois aige an-àirde, 's bha mi ceithir no còig a bhliadhnachan na àite gus gun do sguir mi dar a bha mi trì fichead 's a dhà... no trì fichead 's a... 's e, trì - trì fichead 's a trì.

Cailean MacIllEathain (CM): Cò ris a bha an obair coltach nuair a thòisich sibh ann?

CD: Uill, bha an obair trom an uair sin, gu math atharraichte bhon an obair a tha an-diugh ann. Bhiodh... cha robh ann taigh geamair, 's bhiodh iad a' faighinn mòran dhen an stuth tron a' phost, 's bhiodh eallaich gu leòr ann, dar a bha agaibh ri coiseachd ochd mìle leis. Bha e trom gu leòr mus ruigeadh sibh an ceann eile dhen an sgìre. Shaoileadh sibh aotrom gu leòr e dar a dh'fhàgadh sibh, ach mus ruigeadh sibh an ceann thall cha robh e cho aotrom sin. 'S bha... shin agaibh mar a bha e a' dol an uair sin.

We are grateful to Urras Brosnachaidh na Gàidhlig for its funding to support this work.