Dualchas sa Choimhearsnachd
Tha Tobar an Dualchais air a bhith a' cur air dòigh pròiseact ri àrd-sgoiltean gus tar-chur eadar ginealaichean a bhrosnachadh agus a neartachadh, le bhith a’ dèanamh chlàraidhean de dhaoine aig a bheil Gàidhlig anns na coimhearsnachdan aca fhèin.
Tha sinn a’ toirt seachad trèanadh dha na sgoilearan air-loidhne tro Teams gus am biodh sgilean iomchaidh aca agallamhan le daoine sna sgìrean aca fhèin a dhèanamh agus a chlàradh. Tha còig seiseanan trèanaidh ann, fad mu 40 mionaid gach seisean. ‘S e seo na cuspairean a th' ann:
- Seisean 1: Inntrigeadh dhan phròiseact agus do ghoireasan Gàidhlig
- Seisean 2: Sgilean rannsachaidh
- Seisean 3: Sgilean agallaimh
- Seisean 4: Trèanadh bhideo
- Seisean 5: Obair cead is còraichean
Tha na tidsearan a' frithealadh nan seiseanan trèanaidh sa chiad dol-a mach gus taic a thoirt dha na sgoilearan aca.
Tha sinn cuideachd a' tabhainn seisean taic a ghabhadh àite nuair a bhiodh na sgoilearan a’ dèanamh chlàraidhean le muinntir na coimhearsnachd, nam biodh seo a dhìth. Tha am pròiseact seo freagarrach do sgoilearan Gàidhlig ann an S2-S6, a-rèir fileantachd nan sgoilearan agus tha e iomchaidh do dh’iomadh cuspair, le Gàidhlig, eachdraidh, cruinn-eòlais, nuadh-eòlais, agus ceòl nam measg. Tha cothroman aig na sgoilearan a bhith a’ clàradh fiosrachadh air cuspairean farsaing, mar eisimpleir bheatha agus beò-shlàint’ nam fiosraichean, sgeulachdan, eachdraidh, beul-aithris, òrain agus ainmean-àite nan coimhearsnachdan.
Tha làrach-lìn TAD mar aon de na goireasan a tha feumail airson rannsachadh a dhèanamh. Chì sibh liosta de ghoireasan eile a dh'fhaodadh a bhith feumail fo Stuthan Taic is Foirmichean-cead.
Tha Tobar an Dualchais fada an comain Bòrd na Gàidhlig agus Urras Brosnachaidh na Gàidhlig airson taic-airgid a thoirt dhan phròiseact. Bu toigh leinn taing mhòr a thoirt gu e-Sgoil airson an taic le am pròiseact a chur air dòigh.
