B1 16 - Belief | Creideamh

Transcription

Coinneach: ’S e àm cudromach dhen a’ bhliadhna a tha seo do luchd-leantainn creideamh Ioslaim, an deireadh-seachdain seo a’ comharrachadh àm Ramadain a’ tòiseachadh. Bidh sinn a’ cluinntinn is a’ leughadh mun seo tric gu leòr, ach dè tha e a’ ciallachadh dha-rìribh do luchd-leantainn a’ chreideimh. Tha an t-Urramach Cailean MacLeòid fìor eòlach air a’ chuspair. Tha e còmhla rium air an loidhne à Dùn Deagh an-dràsta. Madainn mhath, a Chailein.

An t-Urr Cailean MacLeòid:  Madainn mhath.

Coinneach: Dè cho cudromach is a tha Ramadan do luchd-leantainn Ioslaim? 

An t-Urr MacLeòid: Uill, an t-àm as cudromaiche den bhliadhna a th’ ann dhaibh. Tha iad ri trasgadh bho moch gu dubh... bhon àm a dh’aithnicheas tu an diofar eadar snàithlean dubh agus snàithlean geal, gu an t-àm air feadh na h-oidhche nach aithnich thu an diofar, agus chan urrainn dhut fiù ’s do smugaid fhèin a shlugadh. Ma nì thu... ma nì thu a dh’aona-gnothaich e. Ma nì thu gun fhiosta e, tha thu alright, ach ma nì thu a’ dh’aona-gnothaich e, tha sin ceàrr. ’S chan urrainn dhut biadh ithe no càil òl no rud sam bith.

Coinneach: Chan fhaod thu càil òl fiù ’s?  

An t-Urr MacLeòid: Chan fhaod. Chan fhaod agus tha e gu math cruaidh... gu h-àraid, uill, man [mar] a tha mi a’ chreidsinn, a tha fhios agad... tha an calendar Muslamach, tha e a’ leantainn a’ ghealach [na gealaich] agus tha sin a’ ciallachadh gu bheil e ag atharrachadh a h-uile bliadhna, a rèir a’ chalendar againne, agus thurchair [thachair] an-dràsta gu bheil Ramadan a’ tachairt meadhan a’ gheamhraidh, ach can gum biodh e meadhan an t-samhraidh agus gum biodh tu ann an Saudi Arabia, mun [mura] b’ urrainn dhut càil òl no càil ithe bho mhoch gu dubh, bhiodh sin gu math gu math cruaidh ort.

SpeakGaelic worksheet: https://speakgaelic.scot/wp-content/uploads/2023/09/SG-B1-C16B-Duilleag-Obrach.pdf