B1 19 - Fashion | Fasan

Transcription

Flòraidh NicIlleathain: Tha mi a' dol a dhol gu Erica. Tha Erica ann an Dùn Èideann. Tha thusa ag obair, Erica, tha do dh'fhir-lagha agus fir-chunntais agus cuideachd a' lorg daoine airson companaidhean a tha a' lorg fir-lagha. A bheil siud ceart?  

Erica NicFhionghain: Tha sin ceart. 

Flòraidh NicIlleathain: Nise...tha...dè an suidheachadh a th' agad fhèin, can, nuair a bhios tu a' dol timcheall nan companaidhean a tha sin?     

Erica NicFhionghain: Tha e a rèir cà' bheil mi a' dol. Uaireannan 's mathaid gum feum mi a dhol a Pheairt, 's mathaid, air an trèana agus ma tha mi a' falbh a dh'àiteigin mar sin feumaidh mi dèanamh cinnteach gu bheil an rud a tha a' dol orms' sa mhadainn gu bheil e a' dol a sheasamh fad an latha agus gu bheil e gu bhith a' coimhead ceart aig deireadh an latha cuideachd. Feumaidh tu a bhith faiceallach gu bheil aodach math anns an aodach agad agus nach eil càil gu bhith a' coimhead robach aig deireadh uair a thìde air an trèana. Tha mi fhìn a' faireachdainn tòrr nas fheàrr ma tha mi cofhurtail leis an rud a th' orm agus gu bheil mi a' faireachdainn gu bheil mi a' coimhead math. Saoilidh mi gu bheil mi a' tighinn air adhart nas fheàrr ann an suidheachaidhean far a bheil mi a' coinneachadh daoine, 's mathaid, nach do choinnich mi ron a seo.   

Flòraidh NicIlleathain: Leithid deiseachan is rudan mar sin, an e? 

Erica NicFhionghain: Gu math tric, cuiridh mi orm briogais agus seacaid a tha a' dol còmhla ri chèile agus tha mi a' faireachdainn cofhurtail le sin.

SpeakGaelic worksheet: https://speakgaelic.scot/wp-content/uploads/2023/09/SG-B1-C19B-Duilleag-Obrach.pdf