Fear a phòs maighdeann-mhara.

Iain MacDhòmhnaill: Tha àite teann air Inbhir Nis ris an abair iad anns a' Bheurla, Kessock Ferry. Mar a theireadh sibh, Aiseag Cheasaig. Agus bha duine a' gabhail a cheum sìos air a' chladach, agus chunnaic e coltas boireannach na cadal. Agus fhuair e grèim oirre, agus gu dè a bh' ann ach a' mhaighdeann-mhara. Agus thug e dhith an cochall, agus dar a bheir iad dhith an cochall, mar a tha a' chùis air innse, chan eil i nas fheàrr na neach eile sa mhuir. 'S thug e dhachaigh i agus phòs iad, agus chuir e an cochall fad... falach ann an àite dìomhaireach ann am bothan, a-mach. Agus bha i daonnan ag iarraidh a' chochaill, agus an cochall cha robh e a' toirt dì. Nam faigheadh i an cochall dhèanadh i air a' mhuir air ais, agus math a bha fios aige air sin.

Ach dh'fhàs an gille aice an-àirde, na chnapach mòr làidir, agus air dha a bhith a-mach mun bhothan, gu dè thàinig e air an rathad ach gun d' fhuair e an t-slige. Agus thug e an t-slige a bha seo a-staigh, 's dar a thug e an t-slige a-staigh dh'aithnich ise dè a bh' ann agus chuir i oirre an t-slige a bha seo, agus rinn i air a' mhuir. "Agus mar a bha mi daonnan ag ràitinn, nam faighinn an cochall cha bhiodh an t-àite a tha seo gun iasg, ged a bhiodh e gann an àiteachan eile, 's duine sam bith a rachadh a dh'iasgach ann, gheibh e iasg uair sam bith ann." Agus i a' faotainn a' chochaill, tharraing i agus thuirt i:

"Cumaidh mi ri mo bhriathran."

Agus gus an latha an-diugh, aig Kessock Ferry, gheibh thu am pailteas de dh'iasg ann ged a bhiodh e gann an àiteachan eile. Agus cha d' fhuair an duine forfhais riamh oirre, ach dar a thàinig e dhachaigh bho obair thuig e mar a bha a' chùis. Chaidh e a choimhead agus fhuair e an t-slige... an t-àite falamh, agus mar sin tha an naidheachd a' dol. Gheibh thu an t-iasg an siud dar nach eil e an àite eile.