Nighean a chunnaic an tiodhlacadh aice fhèin.

Iain MacDhòmhnaill: Bha caileag bheag a' tighinn dachaigh às an sgoil - bhiodh i mu ochd bliadhna a dh'aois - agus dar a thàinig i dhachaigh dh'innis i aig an taigh gum faca i tiodhlacadh, agus chuir e iongantas glè mhòr orra mar a thuirt i:

"Bha m' athair ann agus mo bhràithrean, ged nach robh iad ach glè bheag, mo bhràithrean, agus coffin bheag bhàn aca ga giùlan."

Sia seachdainean an dèidh sin bha i a' tighinn dachaigh às an sgoil agus chaidh i thairis air balla, 's chaidh a goirteachadh gu dona, agus dar a dh'innis... Bha iad a' gabhail iongantas nach tàinig i dhachaigh, 's chaidh iad ga h-iarraidh, 's fhuair iad i leònte aig bonn a' bhalla agus an t-uisge gu bhith thairis oirre. 'S cha d' fhuair i seachad air a' chaisleadh a fhuair i, agus mar sin chaochail i, agus 's e an tiodhlacadh aice fhèin a chunnaic i. Dh'innis i a cheart fheadhainn a bh' aig an tiodhlacadh aig a' cheart spot aig an robh e a' dol seachad, 's nuair a ghabh iad beachd air, 's e sin an tiodhlacadh aice fhèin.